Wednesday, December 12, 2007
Friday, December 7, 2007
淡如水
猶記得小女子有幸成為全香港有史以來第一班參加中文口試的中六生 (請不要計算我的年齡, 謝)
當時的口試小組討論的題目是"君子之交淡如水". 四五個黃毛小子七咀八舌地談論一些自己都不知道的事.
先有一位考生離題, 長篇大論地講自己愉快的教會生活, 教會中的友誼長存, 哈呢露呀! 引得其餘各人爭先恐後地講自己十多歲人仔已衷心感覺人情冷暖, 自己在教會中的生活細節, 溫暖富足, 沒有你虞我詐. 當然當年仍未有教會性醜聞.
仍然清醒的我, 力排眾意, 不理人家講的是什麼教會生活, 九唔搭八全力陳述中國人的智慧. 同洋鬼子不同, 淡而長久. 猛火燃燒時間短; 細火燃燒時間長. 一大堆似是疑非, 阿媽是女人的道理, 自己都不知講了什麼, 但我望到主考官的一個眼色, 估計到同場離題的各人一定沒有好結果. 而有downward comparison 的優勢下. 我的口試成績...... 哈哈哈
拉遠了.
近月與一班朋友有一點誤會, 各人沒有大仇卻天天視而不見. 幾十歲人, 以為自己已練得金鋼不壞之身. 誰知我仍是介意, 仍會受傷.
明明n年前已明白細水長流, 淡如水的教訓道理, 人愈大竟會依然地不知不覺地犯了錯. 一如以往, 孤獨療傷. 我唯有選擇離去. 不懂解釋 . 不會天真地大呼要活得比你好. 只是很傷心. 哭, 沒有了. 因超過了極限.
累而亂
Thursday, December 6, 2007
睇相
昨晚參加某一奶粉媽媽會所舉辦的家長講座 - “從遊戲剖析孩子內心世界(適合0-3歲) ?” 內容廣闊宏大. 聽完之後你可”從兒女如何玩可知他的潛能和明白他的內心世界?”(佢地話)
十個勁!!!!!!!!
兩個多小時講下講東下西, 水過鴨背, 聽過就算 (不要問我為什麼去! 我真係想知呀, 而且是會員福利~)
之後到答問時間. 家長真有趣, 精彩得估唔到. 節錄部份如下
一. 阿女依家十三個月, 佢對所有波都有興趣, 一見就好興奮. 有無咩啟示? (無講大話個姐姐真係用 “啟示”呢個字!)
二. 阿仔依家就黎二十個月大, 佢好鐘意車; 特別鐘意擲爛o的新買番黎新車; 一買就擲; 擲到爛; 爛就唔要. 有無咩啟示?
三. 幾時可以同阿女去做性格測驗, 知佢係咩人?
聽一次, 嚇一次! 大少直情反了數之不盡的白眼
講者起先都滿有耐性嘗試解釋解答. 誰知問題一山還有山高; 家長的問題跟查詢麥玲玲的流年問題同出一徹, 同睇相塔羅牌沒有什麼分別.
問了三至四個睇相問題之後, 她的忍耐力去到極點, 我同大少打賭她幾時擲mic走人.
可以的話, 我真想代她答
一. 大師! 阿女依家十三個月, 佢對所有波都有興趣, 一見就好興奮. 有無咩啟示? (甘佢有無甲組腳? 有的話, 細時踢校制; 大個去踢女足啦)
二. 阿仔依家就黎二十個月大, 佢好鐘意擲爛o的新買番黎新車; 一買就擲; 擲到爛; 爛就唔要. 有無咩啟示? (一係你唔好再買; 一係你搵多o的錢買俾佢)
三. 依家阿女十六個月大, 佢一訓覺就要爬去我地兩公婆張床一起訓; 佢有無問題?(你阿女真係好愛你地daddy mami! 你都係想我甘答你?)
四. 幾時可以同阿女去做性格測驗, 知佢係咩人?(先生, 你洗唔洗去驗下個腦先?)
知道知道明白明白, 為了細少, 你不要再刻薄, 你都是人地阿媽, 人地都是關心阿仔才去參加講座. 你要明白當時現場真係好詭祕; 一大班上左腦的爸媽; 想用一個問題就有人告訴自己阿仔阿女是什麼性格的人, 強項是什麼, 再安排仔仔女女去參加什麼活動playgroup, 去報讀傳統名校定活動教學.
走時還有十多個爸媽圍著講者不願離去, 我只想跟他們講, 仔仔女女在家等你同你玩煮飯仔
Wednesday, December 5, 2007
慎言學言
雖然像是小人兒胡亂在家找一張白紙填上自己心中的說話, 媽媽卻珍而重之收好攜帶到公司再貼在牆上, 人人可見.
細心一看. 見到畫中兩大一小的人兒上寫了一段英文 - "don't disturb mami!"
可能是小人兒天天聽到不同大人所說的說話, 幫工姐姐, 爸爸, 婆婆....... 深深種在腦海中. 這是在職媽媽不能講的悲歌. 或是無可奈可的選擇.
平時口不擇言的我決定由今日開始, 重新學習說話, 細少面前慎言
pk. 大鑊. 打爆. 痴線........平時火遮眼衝口而出的口頭禪通通要從字典中踢走
我很粗, 可以很溫柔!
Tuesday, December 4, 2007
Monday, December 3, 2007
奶奶高峰會議
更可怕是他竟然開始食番夜奶 (!)
細少已經比一般小朋友遲介夜奶 (他食夜奶到九個月大, 即我們只享受了7個月的安睡. 可憐!)
他天天準時凌晨三時 "呢呢! 呢呢!" (即時傳譯 - 奶奶! 奶奶!)
先典再叫後哭歷時十數分鐘死都要食
好似餓左十年無飯開甘可憐
所有幼兒專家親戚朋友都不斷警告你太縱容阿仔十幾個月還食夜奶
依家要訓練 (討厭這個字! 人仔細細, 樣樣訓練) 他介奶, 食大人固體食物.
你仍縱容他一日飲五次奶
有無攪錯!
全都只是細少心引心魔 (wow!)
你們要盡快介介介
對小朋友牙齒不好
我唯一想到是對我們不好! 天寒地凍起身沖奶有害身體
老媽覺得長此下去
對大家都沒有幸福
昨晚與細少進行第一次高峰會議
老媽: bb 你知唔知訓左覺黑麻麻唔好再食奶啦
細少: 車車 (太極高手轉移視線!)
老媽: bb. 訓覺前婆婆同媽咪會沖奶奶你食; 之後要太陽伯伯出黎先再食
細少: 大大 xd#!##)$*$+ (即時傳譯- 你唔洗諗, 我想食就食!)
老媽: 無人黑麻麻會再食野 (咩定論, 甘咩叫 “晚飯”?)
細少: %$*)&!$**車車姐姐爸爸藍妹 (即時傳譯 – 人地肚餓, 甘你俾唔俾. 你唔沖我叫醒哂全家起身)
老媽: 黑麻麻有 “咬烏”媽媽驚. 唔去沖奶奶 (開始語無倫次!)
細少: 爸爸車車 (仲沉醉於周日遊車河的時光)
老媽: 好啦! 由今晚開始, 你要在太陽伯伯起身你先好再飲奶奶啦. 一言為定! Give me five
細少: “竟然” 點頭!
家中各人(即婆婆大少印印姐姐) 對一大一少的對話抱觀望即打定輸算
今早結果……………..
細少由凌晨三時改了四時才飲奶
同志們革命尚未成功大家仍須努力!!!!!
Sunday, December 2, 2007
星期一茶水間
最老土討厭是再與一個女子在茶水間相聚
她的洗杯次序如下
一. 將一隻水杯內隔夜水倒去 (理所當然)
二. 用水龍頭水洗加手擦全程三十秒 (無可厚非)
三. 再裝滿滾水於杯中 (正常)
四. 倒去 (okok 用滾水沖下)
五. 三至四步驟重複三-四次, 次數會根據後面有沒有同事排隊而加以增加 (下!)
六. 裝滿滾水離開 (五分鐘之後)
地球伯伯多得你唔少
多年來觀察所得
公司有不少人都會跟隨上述洗杯洗碗洗飯盒的次序
平心而論有時飯盒真要用熱水沖幾次才不會油林林
洗杯真的需要嗎?
另一重要問題......
此只是他們公司內的清潔方法
我想訪問一下他們在家中的情況
他們就是會order 紅豆冰加熱狗加餐旦麵加西多士為下午茶的人 (當然只限人家俾錢的時候)
Friday, November 30, 2007
Thursday, November 29, 2007
的士高
在電視劇中扮演衰男人的哥仔面不改容理直氣壯地回應....大意為 "人人在的士高傾計, 一定面貼面! 沒什麼大不了!"
大佬! 邊個教你去的士高"傾計"!!!!!! 你的腦袋究竟生在哪裡!
去的士高是玩浦跳望溝識! 傾計應不在to do list 中
單身的你去哪裡傾計沒有人理會! 你與人家零距離面貼面傾計沒有人理你! 不理你豪花幾多錢迎娶太太. 婚後最起碼的專重你都不明白! 原來你與電視劇中衰男人是一樣的.........
鬧完! 安樂! 睡去!
大笨旦
昨日"終於"回歸香港她親愛的九龍仔的懷抱
大少與老媽亦安安樂樂平平安安回到地獄辦公室
哈呢路呀!
細少過去四天的表現比想像中好
除了不停係老媽面前叫"阿POOH" (他叫婆婆的特別方法, 都不知大少遠祖是什麼鄉下!)
老媽像應聲蟲無意識地答: "星期三番!"
最高紀錄是前後來回單打十多次
"阿POOH""星期三番!""阿POOH""星期三番!""阿POOH""星期三番!""阿POOH""星期三番!""阿POOH""星期三番!""阿POOH""星期三番!""阿POOH""星期三番!""阿POOH""星期三番!"
哈哈
旁邊的一路聽一路食早餐的人的目光令我會暫別這間茶餐廳一段時間
身邊很多朋友都覺我和大少多設一舉
家中明明有印印
婆婆只不在家幾天
竟要老爸老媽輪流放假照顧
月付三千多元根本是浪費
不用盡你付出的價錢享受你的權利
大笨旦
所有朋友都知我家印印姐姐只須負責家中家頭細務煮飯沖奶洗奶瓶洗衣服洗廁所等厭惡性工作
細少是不用他努心
由一出生細少起居飲食遊樂睡覺沖涼都是婆婆大少和我的工作
她是主力負責星期一至五
星期六日是我跟大少當值
坦白地承認我們三人實在享受得很
決不假手於人
因為深信無理由會付錢給一個人去天天享受這種樂趣
而自己無間斷地忍受地獄辦公室
再拉開遠少少
我跟細少不止一次見到全身名牌闊太駕車送小朋友去到某九龍塘playgroup
拍拍手飛吻完放低小bb與菲菲姐姐上堂
一個小時後她一袋兩袋姑時lv迪呵再接放學
她不會明白她已錯失了無價的樂趣
因她的小女兒真的很可愛
我在堂上忍不住偷看及摸了她的面仔一下 (你要原諒只有一個野蠻仔的媽咪)
不要問我為什麼不全職在家湊九龍仔
........
我沒有四百萬沒有一桶金去全力投身金股市場錢變錢股變錢錢變股股再變錢
天生可憐沒有橫財命的我只好日日用勞力去換取一份月尾的人工
望著遙不可及的四百萬在苦笑~
Monday, November 26, 2007
回到校園
